Spurt Og Svarað

10 Staðreyndir um Flugfélagið Geirfugl ehf.

1. Þú ert að kaupa hlut í flugfélagi, ekki flugvél.
2. Þú ert að kaupa rétt til afnota af flugvélum sem þú getur selt öðrum á markaðsvirði.
3. Þú þarft ekki að hafa áhyggjur af viðhaldi vélarinnar.
4. Félagið kaskótryggir vélarnar þannig að ef illa fer tapa félagar ekki á óhöppum.
5. Í tímagjaldi er allur kostnaður innifalinn (WET), s.s. mótorlíf, bensín, 50/100 skoðanir o.s.frv.
6. Félagið er rekið sem einkahlutafélag með 5 manna stjórn.
7. Flugtímar félagsmanna og aðrar upplýsingar um starfsemi eru aðgengilegir á lokuðu svæði á vef Geirfugls.
8. Haldinn er aðalfundur á hverju ári og aðrir fundir haldnir eftir þörfum.
9. Reynt er að halda uppi félagsstarfsemi innan félagsins og er lögð rík áhersla á góðan félagsanda.
10. Þegar félagi ætlar að selja hlut tilkynnir hann það stjórninni sem reynir að finna æskilegan kaupanda.

Félagið hefur einnig forkaupsrétt á hlutunum, til að reyna að koma í veg fyrir að "óæskilegir menn" komist inn í félagið. Þannig ver félagið hagsmuni félagsmanna.

Algengar spurningar

Hvers vegna svona margir eigendur?

Því hefur verið oft haldið fram að því færri sem eiga flugvél því betra. Þessu eru Geirfuglsmenn ósammála. Þeir hugsa því FLEIRI því betra, reyndar með ákveðnu fyrirfram gefnu hámarki sem er 25 hlutir á flugvél. Við erum nefnilega þeirrar skoðunar að flugvélar eru gerðar til þess að fljúga þeim og eðlileg nýting á flugvél sé helst ekki minni en 300 tímar á ári. Það er að meðaltali um 6 tímar á viku á ári, eða 20 tímar að meðaltali á félaga. Við megum heldur ekki gleyma því að á þeim árstíma sem hámarksnýting á flugvélum er hér á Íslandi þá er bjart 24 tíma á sólarhring, þ.a.l. er hægt að láta vélina snúast allan sólarhringinn þess vegna. Í mörgum eigendafélögum þar sem frá 4-8 eru saman um að eiga flugvélina, eru menn að reyna að spara sér pening með því t.d. að sleppa kaskótryggingu, láta vélina standa úti, passa sig að fljúga vélinni ekki of mikið og fleira. Það liggur í augum uppi að svona "sparnaðaraðgerðir" snúast í flestum tilfellum upp í andhverfu sína. Það þarf ekki stórt óhapp til að menn sitji uppi með vænan reikning t.d. eftir að aka ofan í holu á Reykjavíkurflugvelli og reka skrúfu niður. Sá reikningur væri
væntanlega upp á lágmark amk milljón, sem getur auðveldlega lagt fjárhag manna í fámennum eigendafélögum í rúst, að ekki sé talað um öll leiðindin sem geta fylgt í kjölfarið. Það er margsannað mál að ef flugvélar hreyfast ekki þá eru margir hlutir í þeim sem slitna meira og verr en ef vélin snýst reglulega. Til dæmis má nefna að framleiðendur flugvélahreyfla miða líftíma hreyfla "recommended TBO" við að mótorarnir snúist 40 tíma á mánuði. Það er líklega engin flugvél í einkaeigu á Íslandi sem uppfyllir það skilyrði.

Fæ ég nokkurn tíma flugvélina?

Tímahámarkið sem er í gangi í dag, þ.e. 60 tíma hámark á ári gerir það að verkum að enginn einstaklingur kemst til lengdar upp með að einoka vélina. Reynsla núverandi hluthafa er sú að í flestum tilfellum er hægt að bóka vélina með 1-2 daga fyrirvara og ná í hana þannig á ákveðnum tíma. Nokkrir kíkja út á völl og fara beint að fljúga. Þetta hefur ekki verið vandamál hjá félaginu og svo komast menn ekki upp með að bóka vélina og fara svo ekki. Ef það á sér stað fá þeir tiltal frá einhverjum í stjórn félagsins. Bókanir eiga sér stað í gegnum síma eða vefbókunarkerfi þannig að menn geta athugað með pantanir og bókað vélina svo lengi sem þeir hafa aðgang að síma eða tölvu.

Hvers vegna er ekki bara stofnað eigendafélag um hverja flugvél fyrir sig með 25 eigendum?

Það sem mælir með því að margir eigi nokkrar vélar saman er t.d. trygging fjöldans fyrir stórum áföllum, eins og ef mótor fer, þá er í flestum tilfellum verið að tala um upphæðir á bilinu 2.500.000 til 4.000.000.kr. Slíkar upphæðir verða viðráðanlegri ef margir eru í félaginu og ef vel gengur þurfa félagar jafnvel aldrei að fá aukareikning út af svoleiðis áföllum. Ef þeir eru líka vel meðvitaðir um rétta meðferð flugvéla, en sú þekking fæst með því að lesa fróðleiksmola frá
reyndari félögum, má nokkurn veginn tryggja líf mótorsins og jafnvel framlengingu.

Hvers vegna ekki bara að leigja flugvélar hjá öðrum flugrekendum?

Hvers vegna ekki bara að leigja bíl á bílaleigu þegar þú þarft á bíl að halda? Þegar litið er á kostnaðar-hliðina við hvern flugtíma er hver flugtími lægri þegar u.þ.b. 10 flugtímum á ári er náð. Það er t.d. sá tími sem einkaflugmaður þarf að fljúga á ári til að halda réttindum. Þegar meira er flogið lækkar fastakostnaður á hvern flugtíma. Ef 60 tíma kvótinn er nýttur til hins ýtrasta fæst lægri upphæð á hvern floginn tíma en ef viðkomandi hefði keypt 100 tíma pakka hjá flugskóla/flugvélaleigu og það er miðað við Cessnu 152. Svo teljum við líka að það sé mun skemmtilegra að fljúga alltaf sömu vélunum sem með tíð og tíma menn læra að þekkja vel. Þannig fæst meira út úr fluginu, með því að þekkja vel takmörk vélarinnar og samspil þeirra og sinna eigin takmarka. Félagið leggur líka áherslu á að þær vélar sem eru í boði fyrir hluthafa eru nýrri og snyrtilegri en gengur og gerist.

Á félagið sitt eigið skýli ?

Já, félagið á Fluggarða 25 sem er hjarta félagsins. Auk þess leigir stórt skýli hjá Flugsögufélaginu, skýli 24. Framtíðin með þeim draumum sem henni fylgir sýnir okkur eitt stórt upphitað skýli fyrir flugvélar félagsins og félagsaðstöðu. Þetta er stórhuga félag sem hugsar vel um eignir sínar.

Hvað gerist ef ég af einhverjum orsökum get ekki greitt reikningana mína ?

Allir reikningar eru innheimtir gegnum greiðsluþjónustu banka. Reglur félagsins segja að ef reikningur er ekki greiddur innan 14 daga frá dagsetningu greiðsluseðilsins eru menn útilokaðir frá flugi á vélum félagsins nema sem farþegar. Meðan reikningar eru ógreiddir safnast á þá dráttarvextir sem renna til félagsins þegar reikningurinn er greiddur. Ógreiddir reikningar eru mjög óvinsælir.

Ætlar félagið að eiga blindflugshæfa flugvél ?

Já, félagið á 2 blindflugshæfar vélar TF-MAX, TF-LMB, í þeim báðum eru góð tæki, með 2x navcom, ADF, DME, encoding altimeter ofl. Allar vélarnar eru með GPS tækjum. Allar vélarnar eru með næturflugsbúnaði.

Hvernig menn eru þetta sem eiga Geirfugl ehf. ?

Alls kyns fuglar. Flestir eru milli tvítugs og fertugs en þó leynast eldri fuglar inn á milli. Þeir koma úr öllum mögulegum starfstéttum en sameinast þó allir í flugáhuganum. Inn á milli eru menn með t.d. kennararéttindi á flugvélar og annast þeir m.a. úttékkanir og kennslu á flugvélarnar.